Tuesday, November 01, 2011

முதுகு சொறியும் கம்பு விற்பவனின் விளம்பரப் பாடல்!

இந்த கம்பினை பாவிக்கும் பாவனயாளர்களின் நலன் கருதியும், அதற்கான விளம்பரப்பாடலை படிக்கப் போகும் வாசகர்களின் நலன் கருதியும் அதன் பாவனையாளர் வழிகாட்டி(User Maual)கீழே தரப்பட்டுள்ளது



முதுகு சொறியும் கம்பு விற்பவனின்  விளம்பரப் பாடல்!


 முதுகு சொறிதலுக்கென்றே
எடுத்த ஜென்மம் இது!.
முதுகு  சொறிக்கும்
கம்பு இது!

ஆதிக்காலம் தொடக்கம்
பழகிப் போன
முதுகு சொறிதல் பணியினை
நவீன யுகத்தில்
தொடர்ந்து செய்யும்
கருவி இது.!

வீண் தொல்லை
ஒன்றும் கொடுக்காது
வீட்டுச் சுவரில்
தன்பாட்டில் தொங்கிக் கிடக்கும்.
உங்கள் முதுகு
சொறிதலுக்கு மட்டுமல்ல
நண்பர்களின் முதுகுகளையும்
சொறிந்து கொடுப்பதற்கு
உதவி 'கரமான' கம்பு இது!

சொறியும் இடத்தை
'காட்டி' கொடுக்கும்
விசுவாசமான  கம்பு இது!
சொறியும் இடத்தை
நாம் 'காட்டி' கொடுத்து 
விட்டால் போதும்
தன் பாட்டில்
தன் பணி செய்யும்!
வம்பு தும்பு
இல்லாத கம்பு இது!

உடலில் கரம் நீளாத
பிரதேசங்களுக்கு நீளுவதனால்
இது- மூன்றாம் கை! 

முதுகு சொறிதலே
இதன் பிறப்பின்
நோக்கம் என்றாலும்,
உச்சந்தலை முதற்கொண்டு
உள்ளங்கால் வரை
சொறிந்து கொள்வதில்
எந்த வித பக்க விளைவுமில்லை.

தலைசொறிதல் எனும் 
(குறிப்பாக பின் தலை)
பழக்கமிக்கவர்களுக்கு
பிடித்தமான கம்பு இது.
பாவிக்கும்
 அப் பாவி  யாருக்கும்
அடிமைப்பட்டு விடும்,
புத்தி கொண்ட,
அப்பாவி யாரையும்
அடிமைப்படுத்தி விடும்
சக்தி கொண்ட
கம்பு இது!

காட்டு மூங்கிலிலான-அதை
காணும் வேளையெலாம்-அதனை
பிடித்து
முதுகை சொறிய வேண்டும்
என்ற உணர்வினை
தானாய் ஏற்படுத்தும்
வசியம்மிக்க மந்திரகோல் இது!

விலையை  பற்றி யோசிக்காதீர்கள்!
சொறிதல் நோய்
பரவாது தடுத்து
மருத்துவச் செலவினை
மிச்சப்படுத்தும் ஒளடத கம்பு இது.!

மூங்கிலிலான
புல்லாங்குழல் இசை
சுகமான அனுபவம் போல்
முதுகு சொறிதலை
சுகா அனுபவ சொறிதலாய்
உணர வைக்கும்
மூங்கிலாலான
மசாஜ் கம்பு இது!

இது பழுது அடைவதில்லை.
கண்ணுக்கு தெரியாத ஆபத்து
ஒன்றும் இதில்லை.
பகிரங்கமாகவே முதுகு சொறிதலை
தன் கைங்க(கா) ரியமாக செய்யும்
மூங்கில் கை இது!

உங்கள் தேவைக்கு ஏற்ப
அதன் வர்ணத்தை
மாற்றிக் கொள்ளலாம்!

வர்ணம் எதுவானாலும்;
அதன் பிரதான பண்பான
முதுகு சொறிதலை
அது நிறுத்தி கொள்ளாது என்பதை
உறுதி அளிக்கிறோம்.!

சிவப்பு நிறம் பூசுவது சிறப்பு.!
சொறிதலில் அது
தோல்நிற-பால்நிலை
இன-மத பேதம் பாராது
எல்லா முதுகுகளையும் சொறியும்.
சமத்துவ உணர்வுமிக்க
கம்பு இது!

இறுதியாய் ஒரு அறிவிப்பு!
சர்வதேச வியாபார குறிகள்   
பதிவுச் சட்டத்தின் கீழ்
இதன் வடிவம்
பதிவுச் செய்யப்பட்டிருக்க கூடும்
என்பதனால்
எந்தவொரு அமைப்பும்
தனக்கான சின்னமாக
இதன் படத்தை பயன்படுத்துவது
சட்டபடி குற்றமாகும்.

குறிப்பாக-
முதுகு சொறிவோர் சங்கம்’  
                                                                        




Saturday, June 14, 2008

தமிழ்நெட்99 விசைப்பலகையே விரும்புக!


கணினியில் விரைவாகத் தமிழ்த் தட்டச்சு செய்யவும் தமிழில் சிந்திக்கவும் தமிழ்99 விசைப்பலகை பயன்படுத்துங்கள்

http://blog.ravidreams.net

Thursday, April 10, 2008

ஜோர்ஜ் புஷ்வும் செக்கடித் தெரு கனகு அக்காவும்




ஜோர்ஜ் புஷ்க்கும்
எங்கள் செக்கடித் தெரு
கனகு அக்காவுக்கும்
பல ஒற்றுமகள்!

கனகு அக்காவின்
மனசு வெள்ளை
புஷ்க்கு தோல்
மட்டும்தான் வெள்ளை.


கனகு அக்காவும்
கொள்ளக்காரிதான்
ஆனாலும்
ஜோர்ஜ் புஷ் மாதிரி அல்ல

புஷ்
பல நாடுகள
கொள்ள அடிப்பதில்
வல்லவர்
கனகு அக்கா
அன்பால்
மனித மனங்கள
கொள்ள அடிப்பதில் வல்லவள்.


'கனகு அக்கா
அப்பா சாயல்' என
அவ அம்மா
அடிக்கடி சொல்வா என
கனகு அக்கா
அடிக்கடி சொல்வாள்
ஆனாலும்
அடிக்கு ஒரு தரம்
ஜோர்ஜ் புஷ் அவர்
தன் அப்பா
சாயலில் இருப்பத
நிரூபிப்பத போல் அல்ல


என்ன ஜோர்ஜ் புஷ்
அண்ட நாட்டில்
சமாதானம் சாக
சண்டை செய்வார்
எங்கள் கனகு அக்கா
அண்ட வீட்டு சண்டைகள்
சமாதானம் ஆக
சண்டை செய்வாள.


கனகு அக்கா கிட்ட
வாய் கொடுத்து
தப்பியவன் கிடையாது
புஷ்க்கு நாடு கொடுத்து
த்ப்பியவன் உண்டா
இவ்வுலகில்?;

நியாயம் காப்பதில்
இருவருமே
முன் நிற்பவர்கள்
ஆனால் என்ன
புஷ் காக்கும்
நியாயத்தின் முன்
'அ'முன் நிற்கும்

இரண்டு பேருக்கும்
எண்ணெய்
என்றால் தனிப்பிரியம்
அதுவும் மத்தியக் கிழக்கு
எண்ணெய் என்றால்
'கொள்ளை' பிரியம்

கனகு அக்காவுக்கு
தலை வலிச்சா
Made in Saudia Arabia
axe oil
தலையில் தடாவ
தூபாய் வாசனை oil
ஆம்!
கனகு அக்காவுக்கு
மத்தியக் கிழக்கு
எண்ணெய் என்றால்
'கொள்ளை' பிரியம்

புஷ்க்கு
மத்தியக் கிழக்கு
எண்ணெய் தன
'கொள்ளை' அடிக்கும்
பிரியம் போல அல்ல;

இப்படியாய்
ஜோர்ஜ் புஷ்க்கும்¢
எங்கள் செக்கடித் தெரு
கனகு அக்காவுக்கும்
கன ஒற்றுமகள்!

ஆனாலும் பாருங்கள்
இருவரிடயே
செய்யும்¢ தொழிலால்
அபார ஓர் ஓற்றுமை

இரண்டு பேருக்குமே
'சுடு' வதுதான் தொழில்.

என்ன-
ஜோர்ஜ் புஷ்
எண்ணெய் கிணறுகளுக்காய்

'சுடு'கிறார்
மனிதர்கள் 'சா' குகிறார்கள்!
கனகு அக்கா
எண்ணெய் தடாவி

அப்பம் 'சுடு'கிறாள்
மனிதர்கள் 'சா'ப்பிடுகிறார்கள்!
அவ்வளவுதான்!

நன்றி 'அமுதம்'-இலங்கை


Thursday, December 14, 2006

இந்த நூற்றாண்டுக்கான கேள்விகள்

-சகமனுஷனை நோக்கி........



அணைக்கிறானா?
இல்லை

நெறிக்கிறானா?

குலுக்கிறானா?

இல்லை

முறிக்கிறானா?


என் மீது படிந்த
தூசியைத்
தட்டுகிறானா?

இல்லை

என்னிடம்
உள்ளதை தட்டிப் பறிக்க
முனைகிறானா?
கனிவுடன்
என்னைப் பார்கிறானா?

இல்லை

பகைமை கண் கொண்டு
என்னை வெறிக்கிறானா?

ஆபத்தில் நான்
மாட்டக் கூடாதென
வாஞ்சையுடன்
என்னை மறிக்கிறானா?

இல்லை

நான் நடந்துப் போகும்
உரிமையை வஞ்சனையுடன்
பறிக்கிறானா?

என்மீது அன்பு மழையை
பொழிகிறானா?

இல்லை

எரிக்கும்
நச்சு திரவத்தை
என்மீது வீசிகிறானா?

என்னைப் பார்த்து
சிரிக்கிறானா?

இல்லை

என்மீது
கோபம் கொண்டு
பல்லைக் கடிக்கிறானா?

ஒன்று பட்டு வாழ
அழைக்கிறானா?


இல்லை

என்னை கொன்று போட்டு
தான் வாழ
நினைக்கிறானா?

இவன்
என் சக மனுஷனா?

இல்லை

பகை மனுஷனா?

Thursday, November 23, 2006

உம்மா சுட்ட ரொட்டியும் ஐ.நா.சபையும்

உம்மா ரொட்டிச் சுட்டா
சும்மா சொல்லக் கூடாது
அது தனி ருசிதான்!
உம்மா சுட்ட ரொட்டியை
சாப்பிட்டவன் எவனும்
சுகமாய் தூங்கலாம்.

உம்மா ரொட்டி சுடும்
அண்டைக்கு எங்க வூட்டுல
பெரிய சண்டைதான்
யாருக்கு-அதிக ரொட்டிகள் என்று!
பிற்குறிப்பு;
உம்மா சுட்ட ரொட்டிக்கும்
ஐ.நா.சபைக்கும் என்ன சம்பந்தம்?
அமெரிக்காவுக்கும் நியாயத்திற்கும் என்ன சம்பந்தமோ?
அந்த சம்பந்தம்தான்!

Sunday, November 19, 2006

அடிக்கப் போ!


எதிரி ஒருவன்
உன்-
ஒரு கன்னத்தில் அடித்தால்
மறு கன்னத்தைக் காட்டு
சொன்னார்கள் சரிதான்!
மூன்றாவது அடிக்கு
என்ன செய்வது?
மீண்டும்-
கன்னதைதையே தேர்ந்தெடு!
எதிரியின் கன்னத்தை
அவனை நீ அடிக்க!

Tuesday, November 14, 2006

ஒரு கேள்வி



சவப்பெட்டி விற்பவனின்


காலைப் பிரார்த்தனை


ஒருவரின் மரணமென்றால்


அவனை-

கொலைக்காரன் என்பதா?